නූතන අවධියෙහි වජිරාරාම සඟ පරපුරට නොමැකෙන එළියක් දැල්වූ, සිරි වජිරාරාම දහම් පාසලේ හිටපු ප්‍රධානාචාර්ය, මහරගම සිරි වජිරඤාණ ධර්මායතනාධිපති අම්පිටියේ ශ්‍රී රාහුළ මහානාහිමියන් අපවත් වෙති.
පරමපූජනීය පැළෑණේ සිරි වජිරඤාණ මහානායක මාහිමිපාණන් වහන්සේගේ ජීවමාන අවසාන ශිෂ්‍ය රත්නය වූ වසර 106ක් සසුන’ඹර බබළවමින් වැඩ විසූ සිරි වජිරාරාම දහම් පාසලේ හිටපු ප්‍රධානාචාර්ය, මහරගම සිරි වජිරඤාණ ධර්මායතනාධිපති, මහෝපාධ්‍යාය, පරමපූජනීය අම්පිටියේ ශ්‍රී රාහුළ මහානාහිමිපානන්වහන්සේ පෙබරවාරි 17 වන දින උදෑසන අපවත් වුහ.
1914 දෙසැම්බර් 24 දින අම්පිටිය ප්‍රදේශයේ උසස් පවුලක් වූ සීමොන් රාජපක්ෂ යුවලට පුත්‍ර රත්නය වූ ධර්මදාස රාජපක්ෂ දරුවා මූලික අධ්‍යාපනය ලැබුවේ අම්පිටිය ශාන්ත මේරී සෙමනේරීයෙනි. පසුව බම්බලපිටියේ සිරි වජිරාරාමාධිපතිව වැඩ විසූ අතිපුජ්‍ය පැළැණේ සිරි වජිරඥාන මහානාහිමිපානන්වහන්සේ වෙතින් පැවිදිව ධර්ම විනය හදාරණ ලදී. නාහිමියන්ගේ අපවත් වීමෙන් අනතුරුව තම සහෝදර හිමියන් වූ අතිපුජ්‍ය මඩිහේ පඤ්ඤාසීහ මහානාහිමිපානන්වහන්සේ සමඟ මහරගම සිරි වජිරඥාන ධර්මායතනය නමින් 1958 අප්‍රේල් 21 වැනිදා භික්ෂු පුහුණු මධ්‍යස්ථානය ආරම්භ කරන ලදී. උන්වහන්සේ එම විහාරස්ථානය මුලික කොට ගෙන එම ප්‍රදේශයේ ආගමික ප්‍රබෝධයක් ඇති කරන ලදී.
මිට අමතරව මහනුවර ප්‍රිම්රෝස් වජිරාරාම විහාරය, බෝවලවත්ත අරණ්‍ය සේනාසනය, මිහින්තලේ කටුපොත අරණ්‍ය සේනාසනය ආදී ශාකා විහාරස්ථාන ද උන්වහන්සේගේ අප්‍රතිහත ධෛර්ය හේතු කොට ගෙන ආරමිභ වූ විහාරස්ථාන වේ.
මෙරට ගුවන් විදුලියේ ප්‍රකට ධර්ම දේශකයාණන්වහන්සේ නමක් වූ රාහුළ හිමියන් වසර දොළහකට අධික කාළයක් මහරගම ගුරු විද්‍යාලයේ බෞද්ධ ධර්මාචාර්යවරයාණන්වහන්සේ වශයෙන් කළ සේවය ප්‍රශංසනීයය. ඉංග්‍රීසි සිංහල දෙබසින් ම ධර්ම ග්‍රන්ථ රාශියක් ද රචනා කළ හිමිපාණෝ විශාල ශිෂ්‍ය පිරිසකගේ ආචාර්යවරයාණන්වහන්සේ ද වෙති. ඇමරිකාවේ වොෂිංටන් විහාරාධිපති මහරගම ධම්මසිරි හිමි, අපවත් වී වදාල ගංගොඩවිල සෝම හිමි, බම්බලපිටිය සිරි වජිරාරාමාධිපති අතිපුජ්‍ය තිරිකුණාමලේ ආනන්ද මහනාහිමි ආදී ශිෂ්‍ය පුත්‍රයාණන්වහන්සේලා රැසකට ම රාහුල හිමියෝ සැබවින් ම පියෙක් විය. සීලවෘද්ධ, ගුණවෘද්ධ, තපෝවෘද්ධ යන ගුණයන්ගෙන් ප්‍රකට වූ උන්වහන්සේ වරෙක ප්‍රකාශ කළේ මේ භවයේ දී රහත් වන්නට නොහැකි වුවහොත් උපදින මතු හැම භවයක දීම පැවිදි වීමට පතන බවයි.
උන්වහන්සේ විසින් සම්බුද්ධ ශාසනය වෙනුවෙන් සිදු කරන ලද මහඟු සේවාව අගයමින් අමරපුර ශ්‍රී ධර්මරක්ෂිත මහා නිකායේ “ශ්‍රී ධර්මරක්ෂිත වංශාලංකාර” ගෞරව නාමයෙන් පිදුම් ලද රාහුල හිමියෝ ලක්දිවට ඉමහත් ආලෝකයක් එක් කරන ලදී. මෙරට ශාසන ඉතීහාසයේ අපරිමිත සේවාවක් සිදු කළා වූ ද බෝසත් ගුණවලින් හෙබියා වූ ද අම්පිටියේ රාහුළ මාහිමිපාණන් වහන්සේ, අතිපුජ්‍ය පැලෑනේ සිරි වජිරඥාන මහනායක මාහිමිපාණන්වහන්සේන්ගේ සුජීවත්ව සිටි අවසන් ශිෂ්‍ය රත්නය වුහ.
ශතවර්ෂාධික කාලයක් ආයු වළඳා, කලක් ගිලව වැඩ සිටි, අතිපුජ්‍ය අම්පිටියේ රාහුල මහතෙරුන් වහන්සේ, අනියත ලෝකස්වභාවය පසක් කරමින්, පෙබරවාරි මස 17 වන සඳුදා දින උදෑසන අපවත් වී වදාළ සේක. උන්වහන්සේ පතන බෝධියකින් නිවනේ නිවී සැනසීම ලබන සේක්වා!
